استشارية نفسية توضح:

20 مفهومًا خاطئًا عن شهر رمضان

الأحد، 20 مايو 2018 11:00 ص
استشارية نفسية توضح 20 مفهوم خاطئ للشهر الفضيل

 
البعض يفهم شهر رمضان بصورة خاطئة، يظن أنه شهر العزومات والأكل والمسلسلات فقط، وهذا ليس صحيحًا، كما توضح وسام عزت، الاستشارية النفسية والاجتماعية، التي رصدت 20 مفهومًا خاطئًا عن شهر رمضان تتمثل في الآتي: 


١- لو تخنت في رمضان يبقى أنتِ فاهمة الصيام غلط


٢- لو محتاجه حد يصحيكِ عشان تلحقي صلاة الظهر يبقى أنت فاهمة رمضان غلط.


٣- لو بتحسي بتقل وأنت بتصلي المغرب والعشاء والتراويح ومش عارفة تتنفسي كويس في السجود يبقى أنت فهمت الفطار غلط.


٤- الصيام أحسن فرصة للي بيدخن أو بياخد أي صنف إنه يبطل إن شاء الله، قدرت توقف من الفجر للمغرب... كمل جميلك ووقف للعشاء ونام.


٥- لو عارفة الممثل الفلاني عمل إيه في التمثلية الفلانية والمهرج فلان عمل مقلب إيه في الممثلة فلانة يبقى إنت فهمت رمضان غلط.


٦- صدقيني، البطن مش مخزن، يعني حتى لو كلت كتير قوي في السحور بردو الأكل حيتهضم بعد ٦ ساعات بالكتير، مش حينوبك من السحور التقيل غير العطش والتخمة والتخن.


٧- أحسن سحور أقله ملحًا وسكرًا عشان العطش، الأكلات العالية في البوتاسيوم بتقلل العطش، زي التمر والموز.


٨- العبرة مش بعدد الختمات، العبرة في القراءة مع الفهم والتطبيق.


٩-ليك كل يوم دعوة لا ترد، ادعوا لدنياكم بس ماتنسوش آخرتكم، ادعوا لنفسكم بس ماتنسوش كمان المسلمين في كل أنحاء الأرض.


10-لبس العيد هو أي لبس جميل عندك أو لسة ملبستهوش، جهزوه من دلوقتي لو حابين عشان مايضعش العشرة الأواخر الله يرضى عليكم.


١١- لو مخاصمه حد أو مزعله حد الحق صالحه.


١٢- خلي معاك أجندة أو كراسة تكتب فيها ملاحظاتك من الآيات وعن نفسك واكتب فيها التغيرات اللي عايز تطبقها.


١٣- الفيسبوك وما يشبهه خصص ليه وقت لا تتعداه ساعة مثلاً في اليوم.
14- أي أكلة هتاخد منك أكتر من ساعة و نص يبقى بلاها، باي باي محشي.


١٥-لو بتدفع في عزومة أو خروجة أو سحور مبلغ العائلات البسيطة بتدفعه عشان يجيبوا أكل الشهر، يبقى فهمت رمضان غلط.


١٦- أبواب الخير كتيرة، حاول يكون لك نصيب من كل باب، حفّظ طفل صغير سورة أو حديث، ابعتي أكلة حلوة للمكوجي، اسألي على طنط العيانة اللي مبتعرفش تحضر العزومات، ابعدي الازازة المتكسرة على الرصيف، روحي اشربي شاي مع قريبتك الكبيرة في السن اللي حاسه بالوحدة.


 ١٧- اشتري وحط عندك في المطبخ من دلوقتي علب وأطباق بلاستيك عشان تعرف توزع أكل بسهولة، واغرف من الأكل وهو سخن وطازة مش لما يبات ويفيض ونفسك تبقى مش رايحة له.


١٨- طبيعتنا اننا بننسى، حط حاجات تفكرك في كل ركن من البيت ومن شغلك، نوتات بتتلزق، سبح، مصاحف على الترابيزات، جدول عمل جنب سريرك تبص عليه كل يوم.


١٩- العبادة رغبة منك واستعداد وعمل توفيقي من ربنا، فادع من دلوقتي إن الشهر ده يكون سبب في تغيير حياتك كلها.
٢٠- أخيرًا وليس آخرًا ادعوا لي بالخير.

اضافة تعليق