هربان من الخوف لعينك00خبيني من اللي فات

خطوة بيني وبينك00وتصحى الذكريات

لو أوصف لك حنيني00كنت أكتب بالساعات

عن شوق جارف ماليني00ومكتفني السكات

خايف أقول بحبك00يصحى كل اللي مات

خايف أقول بحبك00ياخدوني في ليل حزين

يرموني في سجن تاني

وأنا أصلاً سجين

في حبك أولاني

وتاني وتالت بعاني

من حرقة البعاد

أهرب وسط الموانئ00وأشوف غيرك بلاد

ولا بيملي عيني00غير وجهك الحزين

كأنك بتنادني 00رغم مرور السنين

كأنك ياحبيبه00طالعة في ساعة عصاري

فاردة شعرك ضفاير00زي ما كنت زمان

لابسة لي الجلابية00خضرا بلون الغيطان

اجري بالشوق يا عشقي

احضن كل المكان

احضن أرضك ونيلك 

وشمسك في العلالي

مخلوق أنا بحبك

وأنت مخلوقة لي

خايف أقول بحبك

مش ناسي اللي جرى لي

مطرود من جوة قلبك

رغماً عنك وعني

ومهما يبعدوني00حبك ده حته مني

ولو أرفع مرة صوتي

وأتمرد ع السكات

لازم دي فيها موتي

أنا مش ناسي اللي فات

لكن رغم الجراح وسنين الانكسار

بعلن أني بحبك

وحبك انتصار

وحتى لو خدوني

وحتى لو رموني

ياحبيبتي وشردوني

هاغمض بس عيني

واحلم بالنهار