ازيك يا منه؟

أهلا الحمد لله، ازيك انتى يا ريهام؟

الحمد لله سمعتي اللى حصل؟ مش في واحدة من الدفعة بتاعتنا اتجوزت.

ودى كانت أول كلام ريهام معايا اليوم اللى بعده، بصراحة بقيت حاسه إني الكلام عن الجواز بقى حديث الساعه والناس كلها بتتكلم فيه، مفيش بقى عرب ولا قضايا معاصرة ولا حتى مذاكرة

فالمهم رديت عليها وقلتلها ... بجد ربنا يوفقها ويرزقها الذرية الصالحة. بس مش تعب عليها انها تتباع مذاكرتها والجواز ومسئولياته؟

فردت ريهام وقالت لي .. معلش دعوة ربنا معاها

فبصراحه مقدرتش أمسك نفسي والموضوع بدأ يخنقني، فقلت لريهام وبعدين هو اليومين دول محدش بيتكلم إلا عن الجواز دى حاجه تزهق. فردت ريهام باستغراب من ردى وقالت لي

.. خير يا منة مالك شكلك زعلانه من حاجه، وأنا خلاص كنت زهقت من كتر التفكير لوحدي، فقلتلها تعالي نقعد شويه عايزه أكلمك عقبال ما المحاضرة تبتدى وادى اللى حصل:

ادينى حكيتلك كل اللى حصل ع الغدا، ماما بقى معظم كلامها على الموضوع ده، الجواز الجواز، وأنا قلتلها أنا مش رافضه، بس سيبينى أخلص دراستي السنة دى وفي الإجازه نتكلم، ما هيا برده عايزه تفرح بيا، واللى زعلنى من نفسي إني اليومين اللى فاتو سرحت كتير فى الموضوع ده، بس استعذت بالله من الشيطان الرجيم ودعيت ليا ولكل البنات بالزوج الصالح

 .. أنا مش عارفه ازاى أشرح لأمي وجهة نظري؟ أنا حاسه إني مش طريقي إني أفضل قاعدة مستنيه "عدلى" وبعد كده اتجوز وخلاص زى ما بيقولوا البنت آخرتها الجواز، ومع ذلك أنا مش بقلل من أهمية انك تكوني أسرة وتجيبى أولاد تربيهم تربيه صالحة وينفعوا الإسلام، بس بقول مش دى الحاجه اللى عايشين عشانها.

 أنا لسه طريقي طويل، مش اوى، بس لسه أخلص الكلية والماجستير والدكتوراه، ونفسي لما أخلص أكون دكتوره متدينه شاطره، وأساعد ناس كتير، وبرده ربنا يرزقني بالزوج الصالح والأطفال الصالحين، بس مش عايزه أستعجل وأختار غلط

 وحاسه ان أمي بتتغط عليا، وعشان كده أنا متلغبطه اليومين دول، وتركيزي مشتت. وبعد ما خلصت كلامي وحسيت إني استريحت لما اتكلمت بصراحة لقيت ريهام بترد على تليفون جالها وأنا قاعدة ومخدتش بالي خاااالص، وبعد ما رجعت سألتنى كنتي بتقولي إيه؟

بقلم دينا محجوب