وصحيت الصبح لقتنى نايمه مكاني، وقلت لنفسي شكلي كده امبارح راحت عليا نومه؟

أما أقوم أصلي الضحى، واروح الكلية، وكان كلام أمي لسه بيتردد في ودانى، وفجأة...

صباح الخير يا منه، ده بابا كان بيصبح عليا وأنا كأني مش هنا.

مالك يا منه؟

فرديت لا يا بابا، مفيش حاجه

فقال لي طب انتى راحه الكليه؟

فقلت آه

قال لي طب الحقي صلي عشان تلحقى الأتوبيس، وليكى فلوس على الكوميدينو متنسيهاش

شكرا يا بابا، ولقتنى فعلا هتأخر فصليت ولبست ونزلت

ولما رحت الكلية لقيت المحاضره هتتأخر شويه، فكانت فرصتي أتكلم مع صديقتي ريهام وارغى عن اللى جوايا

ازيك يا منه؟

الحمد لله

مالك يا منه شكلك مش عاجبني

فحكتلها على اللى حصل امبارح، وسألتها عن رأيها، فردت عليا وقالت:

بصى يا منه، مامتك من حقها تخاف عليكى، وهيا بس عايزه تطمن عليكى مش اكتر، متكبريش الموضوع فرديت وقلتلها تفتكري كده.... خلاص

واستريحت بعد ما اتكلمت مع ريهام، وافتكرت ان الموضوع بالشكل ده انتهى، وبالفعل الموضوع متفتحش تانى

وفي يوم لما رجعت من الكلية، لقيت ماما وبابا بيتغدوا، فقعدت آكل معاهم، ماهو من ساعه ما رحنا الكلية وكل واحد في متاهته الخاصه، والمواعيد اتلغبطت ع الآخر، وحسيت ان في حاجه، بس كدبت نفسي، لكن اتاكدت لما بصولي وضحكوا.

فقلت: هو في ايه، بيفكرني بفيلم محمد فؤاد هو في ايه؟ مش تضحكوني معاكم

فردت أمي وقالت لي إنه جاي لي عريس دكتور، وكأنها بتقول الحمد لله أخيرا.

فقلت في نفسي هو الموضوع اتفتح تاني؟ هو احنا مش هنخلص؟ بس لو كنت صبرت كنت مقلقتش لأن بابا رفضه

بس المهم سألت ليه؟ فقالت لي إنه عنده شقه في بيت والده صحيح ملك، بس للأسف اوضتين وصالة، وإن بابا بيقول صعب ابتدى حياتي في اوضتين وصالة بس، وان ده هيريحنى في بداية حياتي الزوجية

فقلت يا بابا هو الواحد في بداية حياته لازم يتعب شويه، عشان ربنا يكرمه ويفتح عليه، ويعرف طعم النجاح فكان الرد:

إن بابا تعب كتير في الدنيا، وعايز يشوفنا مستريحين

فقلت يا بابا ربنا سبحانه وتعالى خلقنا في كبد يعني مفيش حد مستريح.

فماما انتهزت الفرصة وسألتني إذا كنت مستعدة إني أسكن في شقة اوضتين فرديت إني ميفرقش معايا، المهم الاقى إنسان خلقه ودينه كويسين بس، الاقيه بس وبعد كده ربنا هيكرمنا إن شاء الله سوا

ولما لقيت الموضوع انتهى، والنقاش هيحتد مبنا، قلت أنهيه مؤقتا وقلت يا جماعه مش وقته الكلام ده، أما أقوم أذاكر

بس اللى لفت انتباهي ان بابا وماما أخدوا القرارات لوحدهم من غير ما يسألوني، وكمان ظهر اختلاف في وجهات النظر مكنش ظاهر قبل كده، مش عارفه هحلها ازاى بس أنا تعبه نفسى ليه دلوقت كل شيء بأوانه.