ويتسفل الحوار بين أبناء الهرم وأبناء الحرم.  وأذكر مرة كنت في حديث مع أحد الصحفيين القطريين هو الأستاذ جمال فايز: وكان طلعان عينه لأنه كان لسة بيتكلم مع واحد مصري قايله الكلمتين الخايبين "المصريين دول أبناء حضارة عشر آلاف سنة ".. مصر أم الدنيا.. إحنا الأصل.. إنتم مجموعة بدو رحل .. ما لكمش حضارة .. مصر خيرها على الكل ..إحنا أبناء اقدم حضارة في التاريخ. إلخ إلخ

 فقلتله يا أستاذ جمال: إذا أي مصري قالك إنه من أبناء الهرم

 فقله إن أبناء الجزيرة العربية هم أبناء الحرم

 وإذا قالك إن مصر عندها النيل

 قله إن ابناء الجزيرة العربية عندهم زمزم

 وإذا قالك إن الفراعنة اتولدوا على أرض مصر

 فقله إن الرسول اتولد في شبه الجزيرة العربية

و إذا حد قالك أن مصر أم الدنيا

 قله: فعلا : مصر أم الدنيا.. و الخليج أبوها!!

 مش فاهمة ليه الاستفزاز ده ..و ليه نفضل نعزز و نزكي خلافات تافهة بين شعوب مصغرين نفسهم وعاملين يتشاكلوا مع بعض زي السلايف .. وده كلمني وحش .. ده بصلى مش عارف إزاي.. و الخلاصة إن النفوس مش صافية .. ومش عايزة تصفى .. وإذا كان من الطبيعي أن يركبهم أي حد عايز يمتطي أي مطية.

 لكن الأغرب إنهم هما العرب اللي بيركبوهم وبيسيدوهم وهما مبسوطين وعلى قلبهم وظهرهم  زي العسل.

غريب أن أدعي أني ابن حضارة عريقة وأني شخصية متفتحة .. ورغم ذلك أرفض فكرة تداول الحضارات والثروات .. وإذا قبلت تداول الحضارات والثروات .. فأقبل ذلك لشعب دون آخر شرط أن يكون شعبا أجنبيا وليس من أهلي وديني..

سأختم يا مامي بكام بيت للأبنودي في نص جميل كتبه اسمه "العنكبوتة"

 يا عنكبوتة كملي عشك                  لاحد حيزيحك ولا يهشك

 لمي مهاجرينك                             وثبتي دينك

 اتمطعي وخدينا في وشك                 بلاد بلا عزه

 ممكن تجيبي أجلها من هزة             بلا ضفه بلا غزه

بلا مصر بلا أردن                          بالدم رشي اللي بماء رشك

 وكملي عشك                               لمي مهاجرينك ولو ملايين

 يا عنكبوتة احنا مش فاضيين           مدي الخيوط خيط خيط

واكسي كل الحيط                           نامي ف أمان واتمطعي ف فرشك

إلى آخر القصيدة

أتركك في رعاية الله يا مامي و إن شاء الله أرسلك رسالة أخرى عن قريب.

سلام

ابنتك داليا الحديدي.