|
رسائل من الدوحة
"أبناء الهرم و أبناء الحرم"
قد لا تمثل لك هذه الرسائل أي أهمية.. لكن لو كنت مغتربًا خاصة في
الخليج فستعني لك الكثير.. فهي ألبوم اجتماعي يجعلك تشاهد مصر والخليج ولكن بعيون
أخرى.
مامي حبيبتي:
رغم أني
عدت من الإجازة من مصر مفيش من أقل من أسبوعين .. مع ذلك فقد بدأت أشعر بال"هوم
سيكنس" ليكي و للعيلة كلها .. هو بصراحة حنين ممزوج بصدمة ذهنية.. و سأشرح لك أسباب
الصدمة في رسالة أخرى.. لكن ممكن تقولي إني فوجئت بمضي سنوات لإقامتي في قطر رغم
أني كنت لا أعتقد أن الأمر سيتعدى السنة.
و
معنى ذلك أني عشت في الغربة أكثر مما عشت في مصر منذ زواجي. مما يؤهلني لترشيح نفسي
لنَيل لقب "خبيرة اغتراب" أو "خبيرة غربة" في منطقة شبه الجزيرة العربية أو في
الخليج. و لو أني مش بأحب استخدام كلمة الخليج وبأفضل لفظ الجزيرة العربية، لأن
الأولى لها دلالة مادية نفطية في الأذهان و الثانية لها دلالة تاريخية و حضارية.
بس
على كل حال كلمة "غربة" فيها برودة تخللي الواحد ممكن يرتجف لو حتى عايش في أغسطس
الخليج.
بنات
مدرسة"المير دي ديو" بيتغربوا يا رجالة
مامي:
هل
كنت تتصوري في يوم إني أتغرب بعيد عن مصر وعنك وأعيش في قطر؟ بصراحة أنا ما كنتش
أتخيل أو أتصور الموضوع ده أبدًا.
ولو
حد كان قاللي إني في يوم من الأيام هاضطر أسافر وأعيش بعيد عن بلدي وعن أهلي ..
وفي الخليج وتحديدًا في قطر.. كنت قلت عليه مش فاهم طبيعتي ومدى ارتباطي بوطني و
بعيلتي أو كنت هاقول: وسعت منه.. خصوصًا إني عشت 12 سنة من صباح حياتي في مدرسة
فرنسية "المير دي ديو" في جاردن سيتي
La Mere
De Dieu
"حكاية" مدرسة المير دي ديو دي يا مامي .. ما كله كان على يدك .. وأعتقد إنك لسة
فاكرة
وقبلها سنيتن في حضانة السان جوزيف في الزمالك
Jardin D’enfant Saint Joseph
أصطبح بوجه مجتمع أبطاله يحملون أسماء من نوعية سير ماري بير
soeur
Marie Pierre
ومار
سان ميشل
mere
Saint Michelle
ومار
ماري دولا بروفيدونس
Mere
Marie de La Providence
ومدام روزموند اللي درستلي الفرنسيه في سنة تالتة
Madame
Rosemonde
ومدام اولجا الخياطة بتاعة المدرسة
ومارسان فان سون دول بول
Mere Saint Vain San De Paul
و دي
كانت مدير المدرسة و من أصل هولندي على ما أتذكر.. وأتذكر كمان أن عم فوزي
.."الكونسيارج" بواب المدرسة كان بيدردش معايا مرة و أخبرني أنها كانت من
عائلة يهودية ولكنها اهتدت للمسيحية وتنصرت ودخلت الدير.
أسماء غريبة بس هي "الدفولت"
الغريبة إني دلوقتي شايفة إنها أسماء غريبة جدًا رغم إني ساعتها كنت فاكرة
إن الأسماء دي هي "الدفولت" أو يعني هي الأسماء الطبيعية.. و أتذكر إن كان عادي
جدًا أنادي الناس.. كل الناس و أي حد بـ مسيو وأنكل ومدام وتانت. طب بزمتك مش
فاكرة لما كنت بنادي عم طه اللي كان بيشتري الطلبات للبيت وأقله "أنكل طه".
أما
زميلاتي فكانوا معظمهم من الناس اللي طالعين فيها.. أو بالبلدي "من علية القوم..
وكمان كانوا "مخلطين" بمعنى إن غالبيتهم فخور إنه من أصل تركي وشوية نص لبناني نص
مش عارف منين.. و شوية من اليونان على شوية من أصل "تالياني" على شوام على أرمن على
مصريين من أصل باشاوات ووغيرهم كتييييييييييييير من نوعية البنات الهاي كلاس أوي،
أو ال" في أي بي"
عارفة يا مامي: فعلا دنيتي اتغيرت بقت حاجة تانية إنتي عارفة النهاردة
صحباتي ومعارفي اسمهم إيه؟
سيبك بقه من كارولين وميشلين وكريستين و ميرال وخدي عندك : أم السعود ولولوة
وشيخة وحصة وموزة و نوف ونورية وعائشة والمياسة ومريم وأم عبد الله ومرام وغنومة
وزينة وغسق وسارة وأم مشعل وغالية والدانة.
و
طبعا إنتي عارفة إني أنا بعد 14 سنة خدمة في مدرسة "ويسترنايز" بقى إسمي "أم محمود
وأم دانة" كل لما أتخيل إن في واحدة من زميلاتي في المدرسة هيعرفوا إني بقيت "أم
محمود" بأشعر نفس شعور أحمد مظهر في فيلم الأيدي الناعمة لما شافوا قريبه النبيل
شوكت و هو شايل الوزة.
وحضرتك طبعا عارفة النوعيات من زميلاتي في المدرسة دي كانت بتتكلم ازاي و بتلبس
ازاي و بتعيش ازاي و بتفكر إزاي. وأقدر أقلك أنهم كانوا مفهمينا أن إحنا مجتمع
يعني خلاصة الخلاصة أو صفوة الصفوة طبعا عرفنا لاحقا إن كله هجص ولا كريم ولا
بسطرمة.
و
بشوية مبالغة ممكن برده أقلك إن ما كناش نستبعد إن البرنس روبير دو موناكو أخو
البرنسيستين كارولين و ستيفاني وابن الأميرة جريس كيلي الله يرحمها و الأمير رونيه
– الله يرحمه برضه- ما كناش نستبعد أن يكون من نصيب واحدة من بنات المدرسة..
لولاكش الحظ العاثر بقه هاهاهها.
وعموما الجواز ده قسمة و نصيب و ربنا يسهل لأمير موناكو -هو على فكرة لسة ما عترش
على بنت الحلال حتى يومنا هذا .. ربنا يسهله. أو على الأقل كنا لما نفكر نكافح و
نبتدي م الصفر فهنضطر نقبل دبلوماسي ولو حتى سكرتير تالت بيبدأ حياته، على أساس
"خدوهم فقراء يغنيهم ربنا" ..
لكن
طبعا ما كانش في تفكيرنا الجواز من ثري عربي أو حتى أمير خليجي على أساس إن بنات
"المير دي ديو" ما يقدروش يعيشوا مع أمراء بيئة خليجية!! و كمان .. حرام البنات
دول مش حمل حر ورطوبة الخليج. خصوصا إن إحنا عايشين قايمين صاحيين نايمين فاهمين أو
مفهيمنا إن إحنا أحفاد الفراعنة بناة الأهرامات، أصحاب حضارة الخمس ..سبع.. تمن..
تسع الآف سنة.. و طبعاً العدد في اللمون .. و كترة العد تقلل البركة.
عارفة نظرتنا كانت عاملة زي إيه.. كانت زي ما الطيار الحربي بيبص لطيار المواصلات و
زي ما طيار المواصلات بيبص لسواق الأوتوبيس.و زي .. و لا بلاش.
أستغفر الله طبعا مش كنا بنقول كده بالحرف. بس فعلا كان في نظرة استعلاء – عند بعض
أو قولي كتير – الله أعلم- وغير نظرة الاستعلاء دي كان في نبرة استعلاء و لغة
استعلاء و لو مش بالقول "فبالبادي لاندويج" أو" بالسبيرت لانجويج" !
ما
تعرفيش بسبب ضيق الأفق أو ضعف البصر والبصيرة. و بالطبع نظرة الاستعلاء دي مش خاصة
بمجتمع المدرسة فقط بل - للأسف وزي ما حضرتك عارفة- كانت فكرة مختمرة ومتعمقة في
وجدان وعقل فئات كثيرة في المجتمع المصري هاكلمك عنها باستفاضة في رسالة لاحقة.
بس
فعلا و زي ما انتي أكيد عارفة بنات المدرسة كانوا "اليت" جدا و طالعين فيها
شويتين و منشيين .. ونفسي أقول إن كلامي على سبيل التبعيض مش التعميم .. بس هكذا
اعتقد. أو أكتر من كدة كنا مش شايفين غير نفسينا وأكيد عارفة المجتمع ده كان بيبص
إزاي لعامة الشعب المصري، فما بالك بنظرته للخليجين.
يعني
مش هاقلك نظرة خاطئة، بس مغلوطة. انتي عارفة كانت نظرتنا ببساطة لأهل الخليج زي
نظرة الغرب والأوروبيين لمصر، صورة لشعب ساذج متخلف محدث نعمة "نوفو ريش" مجتمع
الاويل مان
و"الاويل مان" هذا هو في عرفنا يدلل على الرجل الثري الذي يفتقد الذوق فلا يعرف
كيف يلبس ولا يهتم "باللوك بتاعته".
وكتير سمعنا عن ثري عربي دخل محل"هارولدز" في لندن واشترى عشر بدل ودفع ثمنها
كاملا.. بس عمل مشكلة مع "السيل مان" لأنه صمم يستلم الجاكتات فقط كونه لا يرتدي
سوى الجاكت على الدشداشة أو الجلابية بالمصري.
و
طبعا الكلام ده لما بيتكرر بيرسخ صورة الخليجي الذي يفتقد للباقة واللياقة وفن
الإتيكت أو الأسلوب اللائق في التعامل والتصرف .. يعني مجتمع ما عندوش "جوود
ماننر" جلمف يعني.
والكلام على قسوته إلا إني أستطيع أن أؤكد إنه – و على الأقل في محيطي –فقد
توارثت هذه الصورة عن المواطن الخليجي من كلام المصريين الذين عاشوا في الخليج أو
حتى من الذين لم يقيموا هناك ولكن سمعوا من معارف لهم اشتغلوا هناك.
ورجعوا بعد معاناة في الشغل هناك بسبب موضوعات نظام الكفيل وغيره، فشوهوا صورة أهل
الخليج خصوصا إن المصري اللي بيسافر للعمل في الخليج بيكون حاسس إنه "عزيز قوم
زل" واضطر يشتغل عند ناس كان بيقول عنهم إنهم بدو رحل ..كنا بيرسلهم كسوة الكعبة ..
و موضوع كسوة الكعبة سمعته من مصريين كتير جدا.. ناهيكي عن فكرتي عن بلاد الخليج،
فعلا كنت فاكرة إنها بلاد صحراء جرداء ..لا زرع فيها و لا ماء..قاحلة و الجمال هي
وسيلة المواصلات ..
داليا الحديدي
صحفية
الدوحة
| 
