وصحيت الصبح لقتني نايمة مكاني و قلت لنفسي شكلي كده امبارح راحت عليا نومه

 أما أوم أصلي الضحى وأروح الكلية وكان كلام أمي لسه بيتردد في وداني وفجأة صباح الخير يا منة  فلقيت بابا بيصبح عليا وأنا كأني مش هنا

 . مالكِ يا منّه  فرديت لا يا بابا مفيش حاجه فقالي طب انتِ راحه الكلية فقلت اه قالي طب الحقي صلي عشان تلحقي الأتوبيس وليكي فلوس على الكومودينو فقلتله شكرا يا بابا ولقتني فعلا هتاخر فصليت ولبست ونزلت

 ولما رحت الكليه لقيت المحاضره هتتاخر شويه فكانت فرصتى اتكلم مع صديقتى ريهام وارغى على  اللى جوايا

ازيك يا منه ؟   الحمد لله   مالك يا منه شكلك منتيش كويس  فحكتلها على اللى حصل امبارح وسألتها عن رأيها فردت عليا وقالت:

 بصى يا منه ماماتك من حقها تخاف عليكى وهى بس عايزه تطمن عليكى مش اكتر متكبريش الموضوع  رديت: تفتكرى كده خلاص ماشى . واستريحت بعد ما اتكلمت مع ريهام وافتكرت ان الموضوع خلص  وبالفعل الموضوع متفتحش تانى

  وفى يوم لما رجعت من الكليه لقيت ماما وبابا بيتغدوا فقعدت معاهم شويه وحسيت ان فى حاجه بس كدبت نفسى لكن اتاكدت لما كانوا بيضحكوا براحه فقلت فى ايه مش تضحكونى معاكم فردت امى وقالتلى انه كان جايلى عريس دكتور بس بابا رفضه ف فالاول قلت ايييييييييه هو الموضوع هيتفتح تاااااانى

 بس سرعان مستريحت لما سمعت برفض والدى بس كان لازم اسال ليه  فقالتلى انه عنده شقه فى بيت والده بس للاسف اوضتين بس ووالدى بيقول ده صعب اوى انى اعيش كده وانه عايز يريحنى وميتعبنيش فى بدايه حياتى

 فقلت لبابا يابابا الواحد فى بدايه حياته لازم يتعب شويه عشان ربنا يكرمه ويفتح عليه ويعرف طعم النجاح فكان الرد انه اتعب كتير فى الدنيا وعايز يشفنا مستريحين فقلت يا بابا  ربنا سبحانه وتعالى قال ان الانسان خلق فى كبد يعنى مفيش حد مستريح

 فماما سألتنى يعنى انتى موافقه تسكنى فى شقه اوضتين فرديت انى ميفرقش معايا المهم الانسان اللى هرتبط بيه يكون خلقه ودينه كويسين وربنا يكرمنا فى الباقى  ولما لقيت الموضوع انتهى ومجال النقاش احتد مبنا قلت انهيه مؤقتا وقلت يا جماعه مش وقته اما اوم اذاكر

 بس اللى لفت انتباهى ان ماما وبابا اخدوا قراراتهم لوحدهم من غير ما يسالونى و كمان ظهر اختلاف فى وجهات النظر مبنا مش عارفه هحلها ازاى  بس انا تعبه نفسى ليه دلوقتى كل شئ بأوانه ....