اعلان

 "مطلوب شاب في مقتبل العمر.. محبط.. يعاني من اكتئاب ويأس.. فشل في تجاربه العاطفية -سوسن خانته واتجوزت بداله "زكي وزة" الميكانيكي!-.. حاصل على بكالوريوس أو ليسانس أو لسه طالب بس عارف إنه هيكون عاطل.. حاول يشتغل في كذا شغلانة وفي كل مرة يفشل.. جرب الانتحار مرتين وبرضه فشل! -لما رمى نفسه من فوق الكوبري اتعلق في مسمار، ولما حط نفسه قدام أتوبيس نقل عام كانت الفرامل لسه جديدة!-.. استموت عشان يعرف يهاجر أمريكا.. الفيزا طلعت مضروبة!.. استقتل عشان يروح يشتغل في الخليج.. الكفيل طرده من قبل ما ييجي!..

 الراتب مجزي جداً.. يقدر بملايين الدولارات ومعاها كل ما لذ وطاب من مشهيات "يعني إنت وخيالك!".. الوظيفة بسيطة جداً وتتلخص في كلمة واحدة..."

 جاسوس!

قرأ ميدو الإعلان ده بدون أي تفكير وافق علي الفور وافق ليتخلص من الفقر والفشل المحيط به من كل ناحية ومن كل جانب حضر شنطته وعزم على السفر إلى تلك الدولة المطلوب العمل فيها حجز تذكرة السفر كأي مسافر عادي وكان سبب السفر أدام الناس وفي جواز السفر هو سياحة
يزور تلك البلد ومعالمها السياحية طبعاً كان كل جيرانه وأقاربه ومعارفه مستغربين جداً إزاي الواد ميدو اللي مش لاقي ياكل جاب تمن تذكرة السفر وإزاي عايز يسافر علشان سياحة الواد ده إتجنن ولا إيه كله بقى تمام وكله جاهز فاضل بس إنه يروح المطار ويركب الطيارة ركب ميدو تاكسي ( تاكسي العاصمة طبعاً ) قابض طبعاً وعايش حياته وراح على المطار كنا طبعاً عارفين قصة ميدو وعارفين هو مسافر ليه وعشان إيه
قبل ما يدخل ميدو صالة السفر طلب مخرجنا الجديد من ميدو أننا نعمل معه حوار بدون كاميرا وبعيداً عن الناس استغرب ميدو بعض شوية لكنه وافق

تعالوا نشوف سألنا إيه لميدو وإيه اللي حصل

المذيع: إزيك يا ميدو

ميدو: الحمد لله

المذيع: أنت مسافر ليه يا ميدو وعلى فين

ميدو: يعني مسافر لـــ.... عشان جالي عقد عمل هناك

المذيع: بص يا ميدو إحنا عارفين كل حاجة عنك وخلينا نتكلم بصراحة كده بدل ما أنت لا هاتسافر ولا هاتروح بيتكما

ميدو: إيه هاتكونوا عارفين إيه يعني

المذيع: يعني أنت مش رايح ...... بالاتفاق مع المخابرات الـ... علشان يجندوك هناك

كان الخبر كالصاعقة عليه وكان يتمنى تلك اللحظة أن تنشق الأرض وتبتلعه
اشتدت ضربات قلبه واحمر وجهه كالدم ورد في صوت خافت وكاد أن يهمس

ميدو: مين اللي قال لكم الكلام ده

المذيع: ركز معانا يا عم ميدو إحنا لابنصور ولا في كاميرا ولا مايك وماتخفش
مش مهم مين اللي قال لنا المهم إن دي الحقيقة اللي إحنا متأكدين منها
صج ولا لا؟

ميدو: أيوه صح

المذيع: ميدو أنت ليه وافقت على العرض ده ونتكلم بصراحة وماتخفش

ميدو: ربنا يخليكم استروا عليّ ربنا يستر عليكم

المذيع: ما قلت لك ماتخفش إحنا هانساعدك مش هانؤذيك اتكلم بقى

ميدو: البيه اللي جالي من عندهم عرض عليّ عرض مغري محدش يقدر يقول لا عليه

المذيع: عرض عليك إيه

ميدو: في الأول هاخد مليون دولار وبعد كل معلومة هاجيبها هاخد ميت ألف دولار ده غير أنهم هايحموني وما فيش حاجة هايرفضوها لي

المذيع: وفعلاً ادوك المليون اللي في الأول

ميدو: لسه بس لما أروح هم قالوا كده

المذيع: وأنت متأكد أنهم هايحموك

ميدو: أه هم قالوا كده

المذيع: طيب هايحموك من إيه

ميدو: من أي حد هايتعرض لي من البلد هم قالوا لي كده

المذيع: طيب إيه السبب اللي خلاك تقبل العرض بتاعهم

ميدو: يا بيه أنا أبويا وأمي ماتوا وسابونا أنا وأخواتي التسع بنات وأنا الكبير يا دوب بشتغل عشان بالعافية أأكلهم
يا يه إحنا تعبانين أوي

المذيع: طيب ده مبرر إنك تخون بلدك ؟!!!

ميدو: طيب أعمل إيه مش لاقي شغل وأنا مسئول عن تسع بنات أعمل إيه حد يقول لي أعمل إيه أعمل إيه

المذيع: اهدأ يا ميدو

المذيع: طيب أنت دورت على شغل

ميدو: مادورتش بس هو كده كده مافيش شغل

المذيع: إزاي بقى ما أنت كده غلطان يعني هو الشغل هايحي يخبط عليك ويقولك أنا أهوه تعال اشتغل يا بيه ؟!!

ميدو: عندك حق

المذيع: ميدو إيه علاقتك بربنا ؟

ميدو: عادي بصوم وأصلي في رمضان

المذيع : ده سبب تاني للي أنت فيه

ميدو: إزاي مش فاهم !

المذيع: يعني ربنا بيقول اسع يا عبد وأنا أسعى معاك

يعني مش واحد مش بيصلي خالص ولا بيدعي ربنا ولا بيطلب من ربنا
وعايزه يوفقه في حياته

ميدو :علي استحياء: صح يا بيه

المذيع: خلي عندك انتماء لبلدك ولدينك ولربنا

المذيع: ميدو إحنا ممكن دلوقتي نبلغ عنك وممكن تاخد فيها إعدام أو سجن مدي الحياة

ميدو: لا لا لا لا لا لا عشان خاطري حرام عليكم عندي أخوات بنات هايتشردوا ارحموني ربنا يستر عليككوا

المذيع: خلاص يا ميدو إحنا مش هانعمل كده بس بشرط

ميدو: قل أي حاجة وأنا موافق قبل ما تقول

المذيع: تشيل من دماغك الفكرة اللي كنت مسافر عشانها خالص
تقرب من ربنا وتدعيه أن يوفقك ويرزقك

ميدو: وأنا موافق

المذيع: ميدو إحنا هانراقبك من غير ماتعرف ولو عرفنا إن أنت لعبت بديلك تاني مافيش تهاون بعد كده

ميدو: لا والله أنا هابقي كويس وهاتشوفوا

المذيع: ماشي ياميدو على فكره أنا مش مذيع ولا حاجة أنا ضابط من المخابرات

ميدو: أنا كنت حاسس بكده

وبعد سنتين قابلنا ميدو لقيناه حاجه تانية خالص ده مش ميدو
الحمد لله اشتغل في شركة كبيرة والتزم وبقى شكله جميل وتمنينا أن كل الشباب يكونوا مثله في أخلاقه وفي تدينه وفي اجتهاده في عمله

تعليق الحلقة الرابعة

إنت شفت نفسك في الإعلان؟

يعني حسيت إنه لمس جزء فيك وفي حياتك.. افتكرت "سوسن" -اللي اتجوزت "زكي وزة" خلاص عرفنا!- والجامعة والدراسة والمستقبل غير المشرق والحياة اللي مش طايقة نفسها واللي على طول مصدرة لك وش الاكتئاب والنكد؟!
لو شفت نفسك في الإعلان.. مش عيب خالص..
ماهو أنت جزء من ناس كثيرين بيعانوا من نفس الأعراض دي..

بس ممكن فعلاً تفكر وأنت في الظروف الفل دي وتعاني من كل الأمراض النفسية الممكن تصورها وفوق ده وده عاطل وخالي شغل..

ممكن لو في الظروف دي.. تشتغل.. بس على بلدك؟!

ممكن ماتمسكش المسدس ولا تلبس نضارة سودا ولا تغير تسريحة شعرك فتجيبه من اليمين للشمال بدل ما كنت بترجعه ورا -تمويه يعني- ولا أي حاجة من الحاجات دي اللي بتشوفها في أفلام الجاسوسية..
لأ.. ممكن حتى ماتسافرش بره مصر.. تفضل قاعد فيها.. بس عينك على كل اللي فيها.. تنقل كلام الناس وهمسهم.. وتقبض فـي الآخر بالدولار ومزاجك عال العال؟

ييجي لك قلب تعمل ده؟

عارفين إنه ممكن بعضكم يكون بيضحك في سخرية دلوقت وهو بيقول:

"ناقص ألاقي "يوسف شعبان" طالع من بين الصفحات ويحط إيده على كتفي
ويقول: "مصر محتاجة ليك يا رأفت"!

طب ما هي مصر محتاجة لك فعلاً.. ولو كل واحد في البلد ظروفه وحشة والدنيا معانداه، كان زمان مصر كلها مليانة جواسيس!

بس السؤال هنا هو..
صحيح لو كانت الظروف وحشة فده مبرر لأنك تنقلب على وطنك ودينك؟!
لو جواك طاقة سلبية تجاه بلدك تخليها زي ما هي ولا تحولها لإيجابية وإزاي؟

اقرأ الإعلان من أول وجديد وجاوب لنا على السؤال...

تقبل الوظيفة وتشتغل على بلدك؟