كلاكيت ثالث مرة
الحلقة الثالثة
عيال الـ15 هايتجوزوا عرفي

في صباح يوم مشرق وجميل الشمس ساطعة والسماء صافية والعصافير تزقزق في أصوات تناغمية فتح المذيع عينيه وفيه رغبة عالية أن يصور حلقة في هذا اليوم الجميل ولكن المشكلة أن معد البرنامج توفاه الله في حادث أليم اصطدم بعربية كارو الله يرحمه فكان لزاماً على المذيع أن يعد الحلقة بنفسه فأخذ يفكر ويفكر مع كوب من النسكافيه اللذيذ وفي نهاية الأمر لم يتوصل إلى شيء ففكر أن يأخذ كاميراته الديجيتال ويتوكل على الله لعل وعسى يتكعبل في موضوع وهو ماشي في الشارع

نزل أخونا المذيع من بيتهم وظل يتجول ويجوب شوارع القاهرة حتى أخذته رجلاه إلى الكورنيش

وفجأة

خطف عينيه منظر لاثنين ولد وبنت لا يتجاوز عمرهما الخامسة أو السادسة عشرة قاعدين على أحد الكراسي في جو تملؤه الرومانسية
كالعصفورين على شجرة توت
شد انتباهه منظر الولد والبنت وهم قاعدين بهذا الشكل وصغر سنهم الذي لا يسمح لهم أن يكونوا هكذا
طلب من المصور أن يشغل كاميراته ودخل على العصفورين ... قصدي الولد والبنت يعني

قالهم ممكن نصور معاكم حلقة عن الشباب ؟
رد الولد لأنه مفروض هو الراجل بقى وقال له لا م اينفعش يا بيه علشان حريمنا مش بيتكشفوا على حد
أولاً البنت مش محجبة وقاعدة مع الولد ويداهما متشابكتان وفي شكل مقزز بصراحة

المذيع : يا كابتن ده برنامج مش هايتذاع ولا حاجة ده علشان بنتدرب بس علشان داخلين امتحان الإذاعة والتليفزيون
طبعا كله أي كلام علشان يخلي الولد والبنت يصوروا معه

الولد : آه إذا كان كده ماشي

المذيع : طيب هأسالك شوية أسئلة وترد على أد السؤال وما تخرجش عن الموضوع

الولد : ماشي يلا يا باشا

المخرج : يلا يا جماعة جاهزين .... اكشن

المذيع: عرفونا بنفسكم

الولد : أنا عندي 15 سنة في أولى ثانوي وصاحبتي برضو عندها 15 سنة ومعايا في نفس الفصل !!!

المذيع : يعني إيه صاحبتك؟ يعني إحنا نعرف إن الولد له صاحبه ولد والبنت لها صاحبتها بنت زيها لكن الولد صاحب بنت إزاي مش فاهم ؟

الولد: عادي ما إحنا صحاب بقى وبنحب بعض

المذيع في دهشة: بتحبوا بعض إزاي وأنتم لسه في مدرسة ؟

الولد : عادي بنحب بعض إيه المشكلة

المذيع: طيب نتكلم بصراحة بما أنكم لسه في مدرسة طيب الحب ده آخره إيه ؟

الولد: عادي أدينا عايشين كل يوم بنتقابل وبنتكلم مع بعض في التليفون عادي يعني

المذيع : طيب ولما بتتقابلوا كل يوم مش بتتأخروا على البيت وأهلكم مش بيسألوكوا ليه اتأخرتوا ؟

الولد : لالا ما إنت مش فاهم ما إحنا بنتقابل في معاد المدرسة

المذيع: يعني معنى كده أنكم مش بتدخلوا المدرسة وبتهربوا علشان تتقابلوا كل يوم

الولد: ايواااااااا الله ينور عليك

المذيع: طيب أنت برضو ما جاوبتش على سؤالي إيه آخر الحب ده ؟

الولد: عادي بنفكر نتجوز عرفي علشان مانبقاش بنعمل حاجه غلط

المذيع: عايزين تتجوزوا عرفي علشان ما تعملوش حاجه غلط ؟!!!! أنتم مش عارفين أن الجواز العرفي أصلاً هو الغلط نفسه ؟

الولد : ممممممممممممممم

المذيع: طيب ليه ماتفكروش أنكم تسيبوا موضوع الحب ده شوية لغاية على الأقل تخلصوا الدراسة وتشتغل

الولد: ييااااااااااااااه حلني بقى عقبال ما خلص دراسة وأنا يعني لما أخلص دراسة هأعمل إيه ما أنا كده كده مش هايبقي معايا فلوس علشان أتجوز زي الناس , يا بيه العرفي ميه ميه على خفيف كده لا محتاج شبكة ولا شقة ولا بتاع ورقة بنص جنيه من على الرصيف وكل عام وأنتم وبخير تعالوا زورونا

المذيع : طيب قول لي لو أنت ليك أخت ترضى أنها تتجوز واحد عرفي من غير ما أهلك يعرفوا؟

الولد: ده أنا كنت قتلتها

المذيع: طيب ليه أنت مارضتش على أختك ورضيت على بنت ناس تانية وعايز تتجوزها عرفي

الولد: يا بيه دي حاجة ودي حاجة إحنا بنحب بعض

المذيع : آه صحيح قول لي بقي أنتم حبيتوا بعض إزاي أو عرفتوا بعض إزاي

الولد: آه إحنا حكايتنا بقى ولا روميو جوليت ولا حسن ونعيمه

المذيع: إزاي بقي يا فليسوف ؟!!!!

الولد: الأول أنا كنت بعمل شات وتعرفت عليها وقعدنا نتكلم لمدة أسبوع تقريباً وبعد الأسبوع ادتني رقم الموبايل بتاعها وقعدنا بقى كل يوم نتكلم لمدة أسبوع كمان بس وحبينا بعض بقى وتقابلنا تخيل بقى لما شفتها كانت إيه المفاجأة ؟

المذيع : إيه ؟

الولد: طلعت معايا في المدرسة بس ما كنتش كلمتها قبل كده

المذيع: يعني تعرفت عليها من الشات لمدة أسبوع وكلمتها في التليفون لمدة أسبوع يعني كده أسبوعين
في الأسبوعين دول بس حبيتوا بعض؟

الولد: آه طبعاً أنت ما تعرفش الحب من أول نظرة ولا إيه ؟

المذيع: ايوه بس أنتم لسه عندكم 15 سنة يعني ما ينفعش

المذيع تاني: طيب قول لي أنت إيه اللي عاجبك فيها وأنتِ قولي لي إيه اللي عجبك فيه

الولد: اللي عجبني فيها أنها أمورة أوي عينها زرقة وشعرها بقى إيه أسود وأنا بحب الشعر الأسود أوي ولبسها بقى إيه من اللي قلبك يحبه

البنت : ميرسي يا حبيبي أنا بقى اللي عجبني فيه أنه طويل وجسمه بودي بلدنج وشعر بيطيل كده بصراحة أمور أمور وأي بنت تتمناه

المذيع: طيب محدش فيكم فكر في التاني يا ترى بيصلي ولا علاقته إيه مع ربنا مثلاً ؟

الولد : بص الأعمال بالنيات وكل واحد حر في تصرفاته يعمل اللي هو عايزه

المذيع : طيب قولي لي أنتِ تقدري تقولي لمامتك أو باباكي أن أنتِ بتحبي واحد معاك في المدرسة ؟

البنت: لا لا أنت بتقول إيه لا طبعًا ده مستحيل

المذيع: مستحيل ليه معنى كده أن أنتِ شايفة أن ده حاجه غلط والأهل ممكن يعاقبوكِ عليه

الولد: لالا إحنا مش بنعمل حاجه غلط

المذيع: طيب على كده بقى أنتم بتنجحوا كل سنة وبمجموع ولا إيه ؟

الولد: لا مش كل سنة بننجح يعني الواحد ها يفكر في إيه ولا في إيه

المذيع: يعني أنتم مقتنعين إنكم صح بالرغم من السقوط في
المدرسة والحياة لونها وردي كده

الولد: يا عم أنت هاتحاسبنا ولا إيه ؟ أنت زودتها أوي

المذيع : على فكرة إحنا كنا علي الهوا والناس كلها شافت وسمعت كلامكم وأهلكم زمانهم مستنينكم بالترحيب

الولد : إيه اللي أنت عملته ده منك لله منك لله

البنت : ( مسكت طوبة كبيرة وخبطت بها الكاميرا كسرتها

المخرج : اااااااااااااااه قلبي

المذيع: الله يرحمه

أحمد محمد عبده

21 سنة

هندسه العاشر