كلاكيت أول مرة!

الحلقة الأولى

عنوان الحلقة: مواطن سلبي

المذيع : مساء الخير يا مواطن!

مواطن: مساء البتاع عليكم.. أيون!

مذيع : إحنا بس مستغربين إنت إزاي واقف كده وجنبك الزبالة ومزاجك عادي وفل خالص كأنك واقف بتشم النسيم على شط البحر في الريفييرا!

مواطن: نعم! مستغربين من إيه سيادتكم؟ طيب ما الزبالة في كل شارع وفي كل حتة فيك يا مصر.. اشمعنى أنا يعني اللي لازم لما أشوفها أقف قصادها وأنا مندهش وأصرخ ' ياه.. مش ممكن.. دي زبالة ' !

مذيع: إنت عصبي ليه! لأ مانقصدش بس السؤال يعني.. هو إنت متكيف على الزبالة كده إزاي.. إزاي يا مواطن؟!

مواطن : أستغفر الله العظيم يا رب! زي ما سيادتك متكيف على المرور اللي بايظ والكوسة عشان الشغل والغش في الامتحانات والشباب اللي قاعد على القهوة و.... و....

مذيع : خلاص خلاص يا مواطن.. ده إنت قلبك إسود قوي!

وهكذا أعزائي المشاهدين نقلنا إليكم صورة حية من اختيار عشوائي لمواطن في الشارع وكفاية كده علشان البرنامج باظ...

تعليق معد البرنامج للحلقة الأولى

بذمتك كده إنت شبه المواطن ده ولا مش شبهه؟!

متعايش ومتكيف ومزاجك فل الفل وأنت تتنسم هواء الزبالة كل صباح ومساء وعادي خالص..
ولا بتشعر بالتأفف وبييجي لك ضيق حقيقي ومابتبقاش قادر تتنفس لما تشوف أكوام الزبالة مرطرطة هنا وهناك..

لو كنت من النوع ' المتكيف ' .. يبقى إنت خلاص أصبحت من ' المعتادين على القبح ' ..
ولو كنت من النوع ' غير المتكيف ' .. يبقى لسه فيه أمل.. يبقى ممكن تكون من ' الباحثين عن الجمال ' ..

شايف إنت الموضوع بسيط وعادي.. وإحنا شايفينه العكس..
القصة مش رفاهية بالمناسبة,,
أبداً والله!

لأنه تخيل إن دول العالم بتتسابق في التسلح النووي ومن فيهم يرتاد الفضاء قبل الآخر ومن يكون أكثر قوة اقتصادية.. في حين أننا في مصر.. لا نزال نفكر في المعضلة الكبرى..

' إزاي نتخلص من الزبالة! '

خلينا متفقين إن المشكلة مشتركة بين الحكومة والناس..
الاثنين فشلوا..

لا الحكومة.. بتتوصل إلى حلول منطقية للتعامل مع الفضلات والمهملات –مع إن ده ألف باء دولة يعني-!
ولا الناس.. -اللي هم إنت وإحنا- شاعرين بأهمية الموضوع أصلا ' وإيه يعني لما أرمي ورقة في الشارع ما كل الناس بترمي.. يعني أنا اللي هاصلّح الكون؟! '